Апта бойы сіздер топпен бірге әртүрлі тапсырмалар мен ойындарға қатысып, алғашында қарапайым көрінгенімен, шын мәнінде терең мағынаға ие болған іс-шараларға белсенділікпен қатысқаныңыз есіңізде болар. Ең алдымен, олар сіздерге еркін болуға, ортақ тіл табуға және, әрине, команданың бір бөлігі екеніңізді сезінуге көмектесті.

Ең есте қаларлық сәттердің бірі командалық ойындар болды. Сіздер күрделі тапсырмаларды бірге шешкенде немесе байқауларға қатысқанда, тез келісімге келіп, міндеттерді бөлісіп, бір-біріңізді қолдауға тура келді. Мұндай белсенділіктердің арқасында сіздер тек бірге жұмыс істеуді ғана үйреніп қоймай, бір-бірлеріңізді жақсырақ тани бастадыңыздар: біреулер көшбасшылық қасиеттерін, басқалары шығармашылық ойлауын көрсетті, ал тағы біреулер топты біріктіретін сол «топтың жаны» болды.

Сенімге арналған тапсырмалар ерекше орын алды. Кей сәттерде сіздерге топтағы өз курстастарыңызға сену керек болды, тіпті басында бұл оңай болмағанымен. Бұл бір қатысушының көзі байлаулы болған ойын, ал қалғандары оны бағыттап отырды немесе өзара құрмет пен қолдауды талап ететін тапсырмалар болуы мүмкін. Осындай жағдайларда сіздер бір-бірлеріңізге деген жауапкершілікті сезініп, бір-біріңізге сенудің қаншалықты маңызды екенін түсіндіңіздер.

Ойындар мен тапсырмалардан бөлек, бірінші курс студенттерінің апталығы бейресми қарым-қатынасқа толы болды. Бірге кафеге бару, кешкі серуендер немесе сабақ арасындағы әңгімелер – осының бәрі сіздердің бір-біріңізбен жақын болуларыңызға ықпал етті. Бұл достықтың негізі қаланатын уақыт, ол оқу жылдары бойы және одан да ұзақ уақытқа жалғасуы мүмкін.

Аптаның соңында сіздер, мүмкін, шынайы командаға айналғандарыңызды сезіндіңіздер. Өз ойыңызды білдіруден немесе жаңа нәрсе ұсынудан ұялмайтын болдыңыздар. Сіздер бір-бірлеріңізді тыңдауды, бірге жұмыс істеуді және түрлі жағдайларда шешім табуды үйрендіңіздер.

Бірінші курс студенттерінің апталығы – бұл тек ойын-сауық уақыты ғана емес. Бұл сіздерге университеттің тек оқу орны ғана емес, сонымен қатар жаңа таныстықтар, достарыңыздың қолдауы және, әрине, ұмытылмас әсерлер екенін түсінуге көмектесетін маңызды кезең. Енді сіздер нағыз команда болғандықтан, алдарыңыздан шығатын кез келген сынақтарға төтеп беру оңайырақ болады.

Боранбай Меруерт Жарқынқызы